إنو في شي بعد ينكتب مثلاً؟
أوكي... صباح جديد وشمس جديدة وأفراح وأحزان جديدة
وفيما نتكلم عن الجديد خلينا نراجع الشغلات يلي ضجت فيها هالوسائل التواصل الاجتماعي الرهيبة خلال هالكم عام من ولادتها... أوكي؟
ملاحظة وخطين تحتيها: ما رح نحكي عن الأشياء السخيفة متل الحرية والديمقراطية وحقوق الإنسان وقصص البنوك ومصالح السياسيين وأزمة الاقتصاد الأوروبي والعالمي وسببها وقصص متل حلف الناتو مين هوي ومين بيمثل.... لأنو ما تم تداولها بأوساط شعبية كبيرة.... يلي حكو عن هالمواضيع كانو قلال كثير وما بيستاهلو ينحكى عنهم.
وهكذا أصدقائي، الأشياء المهمة التي تمت مناقشتها خلال السنتين الماضيتين:
- الربيع العربي (ناس بيقولو ربيع وناس بيقولو خريف طبعاً... وحرية الاعتقاد غير مقدسة وتعرضك للنبذ من أي طرف عدم المؤاخذة).
- النظام السوري (ناس بيقولو ساقط وناس بيقولو ما رح يسقط... ونحنا عم نتساقط على الهدا يا ولد يوم ورا يوم... بتسارع خلاب).
- المعارضة السورية (ناس بيقولو عم تتوحد ناس بيقولو ما بتتوحد, ونحنا صار معنا توحد ناهيك عن الأمراض المزمنة الأخرى متل الإدمان والانفصال عن الواقع وسواه من عقد الكبت الجنسي والمعرفي والديني وسواه أيضاً كذلك الأمر برضو يخويا).
- الجيش الحر (ناس بيقولو بيحمي الناس من المرتزقة العملاء وناس بيقولو هني المرتزقة العملاء.... ونحنا خليها بلا حكي أحسن).
- جبهة النصرة: (ناس بيقولو الله ينصرهن وناس بيقولو الله يخسف الأرض تحتيهن).
- حرر عقلك وفكر: (ناس بيقولو برافو عليهن بينتقدو كل شي وناس بيقولو يكسر إيديهن هني لازم يحررو عقولهم بالأول).
- فيليكس: (ناس بيقولو قصة حقيقية وبيصدقو كل شي قالو عنو وناس بيقول كذابين ولاد كلب كلو حكي فاضي).
إي هيك... نسينا حدا شي؟
صح في بعد شغلة تم تداولها بشكل غير رسمي وهي كلمة غريبة إسمها 'الشعب' ما حدا عرف معناها بدقة (في ناس قالو نحنا الشعب وهدول فشرو يكونو شعب متلنا وناس قالو لأ نحنا الشعب وهذوك هني يلي فشرو يكونو شعب حقيقي مثلنا,,,, وظل الشعب ما لو علاقة وما قدرو لليوم وهذه اللحظة بالتحديد يلاقو تعريف جامع معرّب لهالكلمة الصهيونية)... يلي قدرت إفهمو إنو من كلام الكل قلقانين عليه لأنو يبدو عم يتعرض لشي خطر داهم بس الناس مش فاضية تفكر فيه في ضوء القصص السياسية والاجتماعية والعلمية يلي فوق..
بالله ليش ليفكرو فيه أساساًـ مش ليكون إلو تعريف بالأول؟
حدا بيفكر بشي ما إلو تعريف؟؟؟ ييييي أخوث يحكي وعاقل يسمع.
لازم أول شي يفكرو بالتعريف لنعرف مين الشعب ومين يلي مش شعب مشان نعرف نقرر وهني يعرفو يقررو شي تصور عن ماهية هالشغلة العويصة!!
خلص منعمل مجموعة من التعاريف والأعلام والحدود ومنوزع هالكائنات والخشب والصوبيات والقداحات والولاد يلي عنا على هالتعاريف والأعلام والحدود بشكل متساوي أحسن شي.. وهيك ما منضطر نفكر كثير بالشعب الواحد. ما في غير 'الله' دخيل إسمو واحد بهالكائنات الشغلات الثانية جاية على بنفسجي... ولا أنا غلطان؟
فينا منشان الحرية والديمقراطية وهيك نخلي في حرية حركة واختيار للشعوب يعني منصفهم على الدور واحد وراء الآخر تماماً ومباشرةً وعلى الهواء من استديو العربية والجزيرة والدنيا وإلى آخرو، ومنقلو للي واقف بالأول وبالدور بلا مخاوزة: اختار ونقي أي شعب بيناسب جلالتك؟ في عنا من كل الألوان والأنواع وفي عنا محارم عل الكيلو وفي عنا مساطر وخراطات وكتب وموسيقى يعني ما بتحتاج شي وحياة الله... (ضمانات يعني بتعرفو) وإلا كيف بدو يقدر يختار؟ لازم تضمنلو إنو ما يحتاج... إبرة. هيك منكون وزعناهن وريحنا راسنا ولاقينا أسواق لمنتجاتنا من علوك منطاد وكبريت الفرس وغيرو من الصناعات الوطنية المزدهرة.
وخير الكلام ما قل وشل ّ ودلّ وألّف بين العباد والعتاد.
والله المقصد وهو ولي التوفيق.
ليست هناك تعليقات:
إرسال تعليق