إنت يا مؤيد، يا ممانع، يا حامي الأوطان و يا موقف المدّ الأمريكي، وبالروح بالدم بدك تفدي الرئيس، وبولادك بدك تضحي ومبسوط بأصدقاء سوريا (على طريقتك) بلا علاك وسماع مني جوز هالكلام.
وإنت يا معارض، يا حر، يا بطل، يا ثائر يا تشيغيفارا زمانك ، يلي ممضيلي ياها الجيش الحر يحميني مبسوط بأصدقاء سوريا (على طريقتك) بلا علاك إنت الثاني وسماع مني جوز هالكلام.
يعني بالله عليك يا ولد... بعدك مصدّق ومتوقع إنن يحطولك الأخبار المهمّة ويلي بتأثر على حياتك على الصّفحات الأولى من الجرائد ويبثوها على الأخبار حتى لو كانت بتتعارض مع مصالحهم بس لأنن مهتمين فيك وبعيلتك وبالمصداقية يلي من غشمنتك بعدك مصدقا يا ذكي؟؟
معقول راسك لما تفكر إنو هالمحطات وممولينا كثير فرقان معن الحقيقة! لك ما خبروك إنو كل هي المحطات إلها مموّلين (أصحاب شركات نفط وغاز وتجارة وبنوك ومصانع وأسلحة والذي منو)؟ ما فكرت إنو كل الممولين إلهن أهداف، وإنو كل أهدافن ما إلا علاقة برفاهية عيشك يا بتقة زمانك أنت! (كليكما طبعاً).
إنو إنت شو يلي مطمنك لهالدرجة من نواياهن الحسنة وحرصن على نقل الأخبار الدقيقة ؟ لمنك هالك ربي وأنت ممضيلي النهار والليل على copy & paste ومبسوط بحالك على هالصفحات رايح جاي متل الحصان بالبيداء! وإنو حرّ و ثائر ما شالله عليك، يا أمل الثورة والثوار والممانعة والممانعين!
بدك تثور ثور وأنا شخصيا ثائر معك، بدك تمانع مانع وأنا شخصياً ممانع معك، بس بدك توعدني تعرف راسك من رجيلك. عريف إنو ثورتك وممانعتك بعكسن كلن وبتضرّ مصالحن بالتأكيد وما رح يغطو غير يلي بدن ياه، وما رح يوصلو غير يلي بدن ياه، وإنت مش مهم أبداً غير إنك سلبي وغبي وعم يتضحكو عليك لأنك صرت مضحكة! إنت وعيلتك ما بتعنيلهم شي أبداً لا من قريب ولا من بعيد. شايف كل هالزخم يلي عاجق حالك فيه؟ وسهران وبتروح ثاني يوم على الشغل وقد احمرت عيناك من الأرق ولم تعد تستطيع الرؤية يا عزيزي الثائر الموالي المعارض في سبيل الوطن؟ إي لأنك هبلة وبعدك عاقد العزم على إنو الشباب بالجزيرة وبالعربية مهنيين...وإنو الدنيا صوت الناس عنجد!! وممضيلي ياها أخبار ليل نهار واتجاه معاكس وما شابهه وعم يحقنو فيك ويحشرو هالغازات السامة براسك المسكر يلي رح يرجع يفجرك ويفجر الوطن يا أعظم وطني في عالم البوكيمونات...
كاسة شاي مع يلي ما بيشبهك، إي إي انتو التنين زورو بعضكن وبلا هبلنة واحكوا مع بعضكن... الحقيقة فيكن إنتو مش بالتلفزيون، الحقيقة فيكن إنتو لا بمجلس اسطنبول ولا الجيش الحر ولا بالجامعة العربية ولا ببشار الأسد ولا بالتفجيرات يلي عبتصير ولا بمجلس الشعب السوري ولا بكل هالبطيخ الممسمر كلياتو! إنتو الحقيقة، ومنشان ينالو منكن كان لا بد من تقسيمكن بمنهجية منشان تقتلو بعضكن بغباء منقطع النظير. أما إنو عازلي حالك بهالكفن وما عم تسمع غير يلي بيشبهك، ورفقاتك على الفيس بوك هني متلك من نفس الفريكوانسي تبع دماغك المحدود، ورفقاتك بالحياة عم يتناقصو يوم ورا يوم، وممضيلي ياها على التلفاز المعمول ليسرقك... إي بدك تسمحلي معناها قلك إنت مش ناضج يا عزيزي المثقف! إنت مش فاهم حاجة من حاجة على الإطلاق. ويلعن صوتك على صوتو كيف صايرين متل صوت التلفزيون يلي خرب روسيكن وحولكن لأدوات غبية لا تجيد سوى الترديد والنسخ واللصق.
لك هني ما بيخبروك غير الشغلات يلي بدن ياك تعرفها بس، لتظلك مبسوط وهالك ربي بالكوبي بيست تبعك وملتهي عن الأهم. أما الحقيقة يا حياتي فموضوع ثاني ووحياتي عنك ما بيخبروك ياها أبداً، لك حتى لو حاولت تعرفها ما رح يخلوك. خلص هني سامحينلك تشوف الأخبار وإنت يا شاطر نقي واختار، ولا تفكر أبداً هني بيفكرو قدك على ألف مرة، ليش لمنك تفكر وكل شي جاهز وكل شي مبين.
إنت ولا مؤيد: مش مبارح قالولك بالدنيا تبعك إنو اجتمعو مدفيديف ورئيس الصين سوا وبدن يحلو الأزمة السورية ويضغطو على الأطراف الدولية يلي عم تغذي الإرهاب ويحلو الموضوع بشكل سلمي عن طريق مجلس الأمن ومدري شو من هالعلاك؟ طيب خلص مبينة.... يعني الأمور عبيحلوها الشباب، إنت ارتاح وحط رجليك بمي باردة وريحني من صوتك وإنت عم تعيدها ألف وخمسمية مرة بالدقيقة.
وإنت ولا معارض: مش من كم يوم طلع مسؤول سعودي هوي ورفقاتو من أصدقاء سوريا وقال كمان هني عبيدورو على حل وعبيسلحو المعارضة والجيش الحر منشان يصيرو قادرين إنو يدافعو عن المدنيين المعترين يلي بكوك دم؟ طيب شفت ما أحسنن يا أخي؟ خلص الأمور شغالة لمصلحتك كأنو... جيب لكن مي باردة ثاني وحط رجليك في لأنو ما بيسوا تحط رجيلك بلكن واحد إنت وموالي مجرم.... مش هيك علمو راسك يفكر بالقلب؟ عادي المهم. هلق كل منكمنا إذا مش مشارك مشاركلو بشي ست غروبات ومنشان تدعمو كل واحد منكن وجهة نظرو بيعمل شير للخبر (يعني كوبي بيست) وكتيب الله أكبر عم تنحل الأزمة ورح تنجح الثورة أو رح تسقط الفورة (حسب اتجاهك السياسي) ما إنت وااااعي كثير وصار إلك اتجاه سياسي. ما صدقت وصار عندك اتجاه يا بطل.
طفي الدنيا قناة النفاق، وطفي الجزيرة قناة الطائفية... وشغل راسك قناتك الخاصة أحسن ما تظلك مضحوك عليك وحياة اللذين آمنو!!
ليست هناك تعليقات:
إرسال تعليق